باجر عيد لو ورطه

باجر عيد لو ورطه
رجفنه ومالكينه اغطه
بيّعنه الغطه والفرش والماعون
وماعازت كصصنه وباعت النكطه
ولا واحد لغفنه وصرنه حدر ابطه
نجوع انجوع كلش حد يدكنه الجوع
وهذولاك بعدنه انطيح بالخطه
*******
باجر عيد لو حيره
ومامش حتى كنديره
نزرزر ثوبنه المهدول
الماعدنه هدم غيره
ودينه انتداين ثوب من الجار
يوم الماصعب عالثوب تزريره
ثارني احنه اشوه مهنم ثوبنه المهدول
عريانه صفت كل وادم الديره
*******
باجر عيد لو محنه
واحنه اريوكــ ماعدنه
كطعينه الحجي وقفلنه البيبان
خافن لايجي جار ويعايدنه
لان عدنه جهنم عشعشت بالبيت
ما فد يوم دكت بابنه الجنه
كضينه العمرمالحنه كل عنكود
نوبه احنه انتمصع نوبه نتمنه
*******
باجر عيد لو بلوه
مريض وما لكيت ادوه
وصفولي الدوه كلش بعيد بعيد
ولا بيه انه حيل وعالدرب يكوه
ولا عندي واسلف وادفع الكروه
بير من الوجع ومن النزف ظليت
وعليهالجوع كام وشد عزم دلوه
شمرني اعله النصيصه وضنته اركد ماي
ما يدري صكر واتخير العلوه
تطيح اسنين وتنكسر وتضيع
ماهمني العمروسنيني الك فدوه
بس همني الوكت جي عاشرالموخوش
وجي وله علينه ناس ما تسوه
*******
باجر عيد لو ماساة
دعينه من الله تمطر حيل
وبحجة المطر ببيوتنه احنه انبات
المراجيح النه خيط اجروح
ودولايب الهوى النه اهات
وحدايقنه مشاتل جوع
دايرها الحزن شتلات
شظل بينه بعد للعيد
وفضانه الوكت عالقهر عيديات
جان النه صديجٍ كبل اسمه العيد
راح ابعيد ما يرجع بعد هيهات
*******
باجر عيد نكضيه نوم
والطلعه تريد اهدوم
واحنه المانوري الجار
ولا نشكي الاخو فديوم
سوتنه الليالي البوم
صوره ادموع صوره اهموم
وصورة مرضع بلا قوت
راضعها العذاب وترضع الها بتوم
وصوره للنبيه البات امس جوعان
وبصفه الخسيس من الشبع متخوم
وصوره لليتامى الناموا مهرفين
حلموا والحلم كابوس جن جيثوم
فزوا وي الفجر جن فزة مغبشين
فززهم الجوع وما لكو مقسوم
ركضوا للصراير كاموا يدورون
هلبت بالصراير نلكه خركه اهدوم
فلوها الصراير لكو بس اجروح
ولكو ميت الكمر ومشيعاته انجوم

عضو ذهبي

السلام عليكم ورحمة الله وبركاته

شـكــ وبارك الله فيك ـــرا لك ... على المساهمه

موفق بإذن الله ... لك مني أجمل تحية .

عضو فعال

شـكــ وبارك الله فيك ـــرا لك ... على المساهمه

موفق بإذن الله ... لك مني أجمل تحية .